19. 9. 2017: „Бабин Яр. Історія і пам´ять‟ – книжка  написана під редакціов В. Гриневіча і П. Р. Маґочія

17. септембра 2017 завершив ся 24-ый „Форум видавців у Львові: точка творення‟. Шпеціалне оцїнїня „Місто‟ на форумі здобыла нкнига „Бабин Яр. Історія і память‟. Книжка є резултатом сполупраці науковцїв із різных сфер знаня і різных країн світу – Україны, Канады, Голандії, США, Ізраєлю, Франції, якых споїло усвідомлїня важности захованя памяти о Бабинім Яру як сімболу голокавсту і іншых траґедій 20-го стороча.

 

Здобытя шпеціалного оцїнїня книгов, сполуредакторами якой суть Владислав Гриневіч і америцько-канадьскый історік русиньско-мадярьского походжіня Павел Роберт Маґочій, є „злов‟ новинов про праворадикалных елементів на Закарпатю. Такый погляд про сайт „Волошин‟ высловив выдаватель, кандідат наук Валерій Падяк. Він припомянув пробу провокації на презентації іншой книжкы професора П. Р. Маґочія – „Євреї та українці: тисячоліття співіснування‟, котра ся одбыла в Ужгородї 1. септембра 2017. Тогды проблемы настали праві про русиньскый вопрос, якый штудує і пропаґує Маґочій.

 

Дивно выходить: з масовым тіражом выдавати в Ужгородї і Києві книжкы, якы зневажують Русинів – мож, але писати на захрану Русинів – заказано. Писати о Русинах, їх історію, културу – на Українї то уж сепаратізм?.. Думам собі, же нияка з презентації книжок на Закарпатю іщі николи не одбыла ся за такого інтересу пресы, сполочности, „СБУ‟, поліції, партій, представителїв областной адміністрації ітд. Она дає ясну одповідь: праворадікалы на Українї думають о владї. Ці, можно, они уж влада? То залежыть лем од нас і нашой позіції! – підкреслив Падяк.

 

Валерій Падяк дале спомянув, же, можно, в Ужгородї варто припралёвати ся до далшой презентації книгы Маґочія. На тот раз – уж тітулованой шпеціалным оцїнїнём Львовского форуму выдавателїв.